lr-relazzjoni bejn il-lingwa u d-dinja ekstralingwistika : il-ġens grammatikali u s-sess tal-persuna

Abstract

Inkitbu bosta studji lingwistiċi dwar kifl-ambjent li ngħixu fihjista' jaffettwa l-istrutturi u l-iżvilupp tal-lingwa li nitkellmu u studji oħra li jiffukaw fuq id-determiniżmu u r-relattiviżmu lingwistiku. Xogħlijiet bħal dawn donnhom aktar produċew mistoqsijiet milli waslu għal konklużjonijiet definiti dwar ir-relazzjoni li teżisti bejn il-mekkaniżmu lingwistiku u d-dinjaekstralingwistika. Madankollu, jeżisti bħal qbil ġenerali li hemm tassew xi forma ta' relazzjoni bejn il-mod li bih naħsbu, il-lingwa li nitkellmu, u l-kultura partikolari li ngħixu fiha. Din il-ktiba tiffoka fuq aspett partikolari tal-lingwa-il-kategorija tal-ġens grammatikali, u wara li tagħti ħarsa ħafifa lejn id-distinzjoni ta' bejn il-ġens u l-ġeneru, tittratta f'ċertu dettall ir-relazzjoni li teżisti bejn il-ġens grammatikali u s-sess tal-persuna. Il-qofol ta' dan l-istudju huwa (i) l-ispjega ta' kif taħdem is-sistema tal-ġens grammatikali fil-Malti fil-każ tan-nomi animati li jirreferu għal persuni, u (ii) it-tagħrif dwar il-mekkaniżmu grammatikali li joffrilna lsienna biex niddistingwu bejn persuni ta' sess differenti fis-soċjetà tagħna.