L-importanza tal-aspett viżiv fid-Deċiżjonijiet 2

Abstract

Ħafna minna żgur niftakru l-ewwel snin tagħna l-iskola meta l-għalliema, b’paċenzja kbira, bdew jgħallmuna naqraw u niktbu. Kienet fażi fil-proċess edukattiv li forsi, ta’ tfal li konna, dak iż-żmien ma fhimniex biżżejjed l-importanza tagħha u wisq anqas bsarna x’influwenza kellha tħalli fuq il-ġejjieni tagħna. Jista’ jkun li dak iż-żmien konna ninkwetaw aktar fuq id-diffikultajiet assoċjati ma’ din il-fażi ġdida u eċċitanti f’ħajjitna, bħal kif se nżommu sew il-lapes, kif se niktbu pulit fuq il-pitazz u forsi l-akbar problema, kif se nitgħallmu niktbu l-kliem ġdid. Jista’ jkun li ħafna minna konna nsibuha xi ftit eħfef biex nitgħallmu niktbu l-kliem bil-Malti milli l-kliem bl-Ingliż minħabba, fost oħrajn, li s-sistema ortografika tal-Malti hija aktar fonemika mis-sistema Ingliża fis-sens li fil-Malti r-relazzjoni bejn is-simbolu (l-ittra tal-alfabett) u l-ħoss li jirrappreżenta hija aktar b’saħħitha. Tant li x’aktarx mhux l-ewwel darba li, b’mod mhux korrett għalkollox, l-għalliema qalulna li l-Malti ‘niktbuh kif inħossuh’. Sistemi ortografiċi fejn ir-relazzjoni bejn il-fonemi u l-grafemi li jirrappreżentawhom hija b’saħħitha ħafna bl-Ingliż jissejħu ‘shallow orthographies’ u dawn iwasslu biex l-ortografija tkun aktar konsistenti. Fost il-lingwi li għandhom din it-tip ta’ ortografija nsibu l-Ispanjol, il-Finlandiż, itTork, it-Taljan u l-Pollakk.