Ġabra ta’ kliem bil-Malti ddokumentat fil-prietki qodma ta’ Injazju Saverju Mifsud

Abstract

F’din it-teżi ser nanalizza u niddiskuti l-lingwa użata f’żewġ prietki ta’ I. S. Mifsud. L-ewwel waħda hija l-prietka li saret fil-Knisja ta’ San Publiju, fil-Furjana, fis27 ta᾿ Diċembru tal-1741, u hija fuq il-ħidma u l-qdusija tal-Evanġelista San Ġwann. It-tieni waħda, saret fil-Knisja tal-Fortizza tar-Rikażli, fil-Kalkara, fl-24 ta᾿ Diċembru tal-1743; ippreżentatha fi żmien il-Milied; appuntu waqt il-quddiesa solenni ta᾿ lejlet ilMilied, u għalhekk din kienet tittratta t-twelid ta᾿ Sidna Ġesu Kristu (Zammit Ciantar 513). Il-prietki ta’ I. S. Mifsud huma xhieda żgħira tal-Malti miktub li gћandna, u gћalhekk gћandhom importanza kbira. L-għan ta’ din it-teżi hu li titkompla l-ħidma tal-ġbir tal-lessiku li jinsab fil-prietki ta᾿ Mifsud, sabiex ’il quddiem, ix-xogħol jinġabar f’dizzjunarju storiku li jiddokumenta l-evoluzzjoni tal-lingwa. Attwalment id-dipartiment tal-Malti ilu mill-2011 jħeġġeg lillistudenti tal-Malti sabiex ikomplu fuq din il-ġabra lingwistika. […]