Kif jitwieled servitu’

Abstract

Meta nitkellmu dwar liġijiet għall-utilita’ pubblika, jiġuna f’moħħna dawk il-liġijiet u regolamenti partikolari li jimponu restrizzjonijiet fuq l-użu ta’ l-art bħalma huma r-regoli ta’ l-ippjanar. Biex nieħdu eżempju, il-policies sussidjarji ta’ l-ippjanar li jirregolaw l-ogħli tal-bini huma meqjusa bħala regolamenti għall-utilita pubblika. Insenjament riċenti dwar dawn it-tip ta’ servitujiet jinsab riportat fil-każ George Felice et. Vs Keith Attard Portughes et.1, fejn l-intimat Attard Portughes kien ottjena permess mill-Awtorita’ ta’ l-Ippjanar biex jibni bungalow li, skont il-Qorti, ma kienx jidħol fil-best fit line kif iridu l-policies ta’ l-ippjanar. Il-Qorti, għalhekk, tat raġun lill-atturi ġirien wara li kkonkludiet li kien ser ikun hemm ‘overlooking’ minħabba l-għoli ta’ parti tal-binja ma kinitx konformi mal-best fit line kif trid il-policy. Quddiem din is-sitwazzjoni, il-Qorti laqgħet it-talba tal-atturi ġirien u ordnat li jitneħħa l-bini ta’ Attard Portughes minkejja li dan kellu permess ta’ l-iżvilupp maħruġ mill-Awtorita’ ta’ l-Ippjanar. Għalhekk, persuna li tottjeni permess li jippermetti aktar ogħli minn dak li jippermettu l-policies tista’ ssib ma’ wiċċha azzjoni kontra tagħha mill-ġirien (fil-vesti tagħhom ta’ sidien tal-fond dominanti) li jkunu qed jirreklamaw a favur taghhom servitujiet maħluqa mil-liġi għall-utilita’ pubblika hekk kif stabbiliti minn liġijiet jew regolamenti speċjali in bażi ta’ l-Artikolu 402(1).