Ġesù ħobż tal-ħajja

Abstract

Aħna l-insara spiss nippruvaw inġeddu l-fidi tagħna fil-presenża reali ta’ Ġesù fl-Ewkaristija. Din il-fidi tagħna kontinwament tirreferina lejn il-kliem tal-Mulej fl-aħħar ċena, kif insibuhom miktuba fir-rakkonti li jagħtuna l-Vanġeli Sinottiċi, jiġifieri l-Vanġeli miktuba minn San Mattew (26:26-29), San Mark (14:22-25) u San Luqa (22:14-20). Imma rridu niftakru li kien San Pawl, fil-bidu tas-snin ħamsin wara Kristu, li huwa l-ewwel kittieb tal-Ġdid Testment li jagħtina r-rakkont tat-twaqqif ta’ l-Ewkaristija. Dan jagħmlu huwa u jikteb l-Ewwel Ittra tiegħu lill-Korintin fejn jagħtina l-essenzjal rigward it-twemmin nisrani fl-Ewkaristija, daqs għoxrin sena biss wara l-mewt u l-qawmien ta’ Ġesù (1Kor 11:23-26): “Jien irċevejt mingħand il-Mulej it-tagħlim li għaddejt lilkom, jiġifieri, li l-Mulej Ġesù, fil-lejl li fih kien ittradut, ħa l-ħobż u wara li radd il-ħajr, qasmu u qal: ‘Dan hu ġismi li jingħata għalikom; agħmlu dan b’tifkira tiegħi’. Hekk ukoll għamel bil-kalċi wara li kiel u qal: ‘Dan il-kalċi hu l-patt il-ġdid b’demmi; agħmlu dan kull meta tixorbu b’tifkira tiegħi’. Mela kull meta tieklu dan il-ħobż u tixorbu dan il-kalċi, intom ixxandru l-mewt tal-Mulej sa ma jiġi”.