Il-Malti f’Malta u fl-amministrazzjoni pubblika

Abstract

F’diskursata dwar il-lingwa spiss jingħad kemm għandna għax inkunu kburin bil-Malti: “Hawn pajjiżi ferm ikbar minn tagħna li jużaw il-lingwa ta’ ħaddieħor, u aħna – daqsxejn ta’ gżira – ixxurtjati li għandna l-ilsien tagħna.” Tisma’ li għandna nagħmlu “minn kollox” biex il-lingwa “nibżgħu għaliha” u “ma nitilfuhiex” għax tagħtina identità. Imma meta tipprova toħdilhom minn rashom x’jifhmu b’“minn kollox” ħafna qajla jsemmulek, ngħidu aħna, li jistgħu jibdew huma stess mid-dar billi jkellmu lil uliedhom u lin-neputijiet żgħar bil-Malti. Il-lingwa b’hekk “nibżgħu għaliha” għax ngħadduha lill-ġenerazzjonijiet li tilgħin f’kull kuntest. Jekk lit-tfal inrawmuhom jesprimu ruħhom aktar jew bl-Ingliż biss, għada pitgħada wħud minnhom ikunu l-uffiċjali pubbliċi li jużaw l-Ingliż biss fuq ix-xogħol għax il-Malti ma jħossuhx naturali. U nibqgħu nisimgħu l-ilmenti (ġusti) li l-Malti qed inwarrbuh.