‘Il-mara l-oħra’ : il-profil letterarju ta’nisa f’relazzjonijiet ta’ mħabba meqjusin ‘illeċiti’

Abstract

F’soċjetajiet fejn il-monogamija hija prattika mhux biss soċjali iżda wkoll morali u legali, relazzjonijiet romantiċi ’l barra miż-żwieġ huma meqjusin bħala devjanti. Madankollu, kemm fil-mitoloġiji, kemm fil-leġġendi u anki fil-letteraturi ta’diversi popli jiġu rrakkuntati listejjer ta’ dawn ir-relazzjonijiet ‘devjanti’, u spiss il-ħarsa taqa’ fuq l-hekk imsejħa “il-mara loħra”. Din it-teżina se tħares lejn il-karattri nisa f’relazzjoni ma’ rġiel miżżewġin jew f’relazzjoni li ma timxix mal-kodiċi soċjali, li jidhru fil-letteratura lokali ta’ perjodi differenti. Din il-ħarsa se tinkludi wkoll l-analiżi tal-imġiba tan-nisa miżżewġin sabiex toħroġ iddiskrepanza bejn il-mara tad-dar u l-mara l-oħra. Għalhekk, jista’ jingħad li dan l-istudju ma jkoprix biss il-kunċett tal-mara l-oħra, iżda jitwessa’ għal suġġetti oħra relevanti bħallinfedeltà, il-karatteristiċi femminili, u l-imġiba maskili, fost oħrajn. Għall-fini ta’ din l-analiżi, din it-teżina se tittratta r-rumanzi ‘Leli ta’ Ħaż-Żgħir’ ta’ Ġużè Ellul Mercer, ‘Il-Gidba’ ta’ Oliver Friggieri u ‘Aħna Sinjuri’ ta’ J.J. Camilleri, b’għadd ta’ referenzi oħrajn għal xogħlijiet barranin li jinkludu l-istess temi.