Il-Malti u l-Ingliż fost it-tfal : studju fuq il-preferenzi u l-attitudnijiet lingwistiċi

Abstract

Din it-teżina għandha żewġ għanijiet; l-ewwel li tistħarreġ il-preferenzi u l-attitudnijiet lingwistiċi lejn il-Malti u l-Ingliż fost it-tfal Maltin ta’ bejn id-9 snin u l-11 -il sena, u t-tieni li tqabbilhom ma’ tal-ġenituri/kustodji tagħhom. Ir-riċerka tesplora kif jintużaw il-Malti u l-Ingliż f’ambjenti differenti u jekk il-kuntest jinfluwenzax l-għażla tal-lingwa. Barra minn hekk teżamina l-impressjonjiet personali tal-parteċipanti dwar il-ħiliet lingwistiċi tagħhom. Biex jintlaħqu dawn l-għanijiet intuża l-metodu kwantitattiv; saru kwestjonarji forma ta’ intervista wiċċ imb wiċċ ma’ 57 tifel u tifla ġejjin mill-ħames reġjuni ta’ madwar Malta u ma’ wieħed jew waħda mill-ġenituri/kustodji tagħhom. Mis-sejbiet ewlenin ħareġ li l-Malti jintuża l-iktar fl-ambjent tad-dar, filwaqt li mal-ħbieb u fl-iskejjel jintużaw aktar iż-żewġ lingwi.