Il-vjolenza fir-rumanzi ta’ Ġużè Muscat Azzopardi

Abstract

Il-kelma ‘vjolenza’ f’rabta mal-letteratura u mal-kritika letterarja jaf tinstema’ stramba għal xi wħud. L-għan ta’ dan l-artiklu hu li l-qarrej jifhem kemm il-vjolenza jista’ jkollha parti integrali u kumplessa f’xogħol letterarju daqskemm ikollha fil-ħajja nnifisha. Billi dan l-istudju jiffoka fuq ir-rumanzi storiċi ta’ Muscat Azzopardi, wieħed japprezza kemm din it-tema ilha tippersisti fil-letteratura Maltija. Fl-ewwel taqsima ta’ dan l-artiklu se tingħata ħarsa ħafifa lejn it-tipi prinċipali ta’ vjolenza. B’dan il-mod, il-qarrej jikseb l-għarfien meħtieġ li jiġi applikat fil-kritika. Fit-tieni taqsima se tiġi diskussa r-relazzjoni tal-vjolenza mal-politika, mal-ħsieb u mal-arti, filwaqt li simultanjament jinxteħet dawl fuq kemm il-vjolenza kapaċi tagħti gost f’kuntesti sekondarji, jiġifieri fejn wieħed ma jkunx qed jipparteċipa direttament. It-taqsima li ssegwi se tapplika dan kollu li ntqal għar-rumanzi ta’ Muscat Azzopardi, fejn se jiġu diskussi l-osservazzjonijiet prinċipali tat-teżina. L-aħħar taqsima, imbagħad, se tagħti sommarju tal-konklużjonijiet li nġabru minn dan l-istudju.