Rakkonti mill-bogħod : stejjer qosra mill-Użbekistan

Abstract

Dan il-ktieb huwa frott ta’ kollaborazzjoni bejn id-Dipartiment tat-Traduzzjoni, Terminoloġija u Interpretazzjoni tal-Fakultà tal-Arti tal-Università ta’ Malta u d-Dipartiment tat-Teorija tat-Traduzzjoni u l-Lingwistika Komparattiva tal-Fakultà tal-Filoloġija Komparattiva tal-Università Nazzjonali tal-Użbekistan. F’dan il-proġett, il-partijiet imsieħba qalbu ġabra ta’ novelli mil-letteratura ta’ xulxin mill-verżjonijiet bl-Ingliż, u kkonsultaw ma’ xulxin biex jissolvew dawk l-aspetti kulturali li joħolqu diffikultà biex jinftiehmu mill-qarrej aħħari. Il-Prof. Gulnoza Odilova (illum ta’ Kimyo International University) għażlet din il-ġabra ta’ novelli, maqluba bl-Ingliż fl-2013 minn Mahmuda Saydumarova bit-titlu ta’ A Collection of Uzbek Short Stories, ippubblikata minn AuthorHouse ta’ Bloomington, Indiana fl-Istati Uniti. It-traduzzjonijiet tan-novelli, għajr l-ewwel waħda, saru minn eks studenti tad-Dipartiment skont kif jidher fil-Werrej, u ġew riveduti minni u minn Dr Claudine Borg. Ta’ min isemmi wkoll il-kontribut importanti ta’ Dr Saydumarova stess, li mhux biss ġabet il-permessi biex jintużaw dawn it-testi, iżda f ’konverżazzjoni elettronika tul ir-reviżjoni ċċarat bosta aspetti tat-traduzzjoni tagħha għall-Ingliż u xi aspetti kulturali oħra li mhumiex spjegati fit-test bl-Ingliż. L-entużjażmu u l-għajnuna tagħha, tal-Prof. Odilova u ta’ dawk kollha li ħadu sehem f ’dan il-proġett kienu tassew apprezzati.