Il-varjanti fonetiċi-ortografiċi : il-bidla fil-vokali

Abstract

Il-qofol ta’ dan l-istudju jinsab primarjament fl-analiżi, li ġiet maqsuma fi tliet kapitli. Fl-ewwel kapitlu tal-analiżi, jiġi studjat b’mod ġenerali liema varjant huwa l-aktar popolari għal dawk is-sittin parteċipant li mlew il-kwestjonarju darba biss. L-importanza ta’ dawn il-kwestjonarji kien biex jiġu studjati l-varjabbli tal-età u tal-lokalità tal-parteċipanti. It-tieni kapitlu tal-analiżi ser jittratta sittin parteċipant ieħor li mlew il-kwestjonarju darbtejn fi spazju ta’ ġimgħa. L-iskop ta’ dan kien li jiġi studjat jekk l-istess parteċipant huwiex konsistenti fl-għażliet tal-varjanti li jagħmel minn ġimgħa għal oħra. Dan jisħqu William Labov meta jgħid li f’kull kelliem hemm Style Shifting u jgħid li ‘There is no single-style speakers.’ (Bratt Paulston; Tucker 234) Finalment l-analiżi tagħlaq bl-aħħar kapitlu li ser ikun jittratta fil-qofol tiegħu id-differenza fil-parteċipanti bejn il-kitba u t-taħdit. Dan il-kapitlu huwa wieħed interessanti għaliex l-iskop prinċipali tiegħu kien li jaqbad il-parteċipant meta jkun aljenat biex jinkiseb mingħandu tagħrif lingwistiku li joħroġ kemm jista’ jkun b’mod spontanju. Dan it-tagħrif imbagħad kien ikkomparat ma’ tagħrif ieħor miksub mill-parteċipanti permezz tal-kitba minħabba li waqt din l-attività, normalment, il-parteċipant ikun aktar konxju ta’ dak li qed jagħmel. B’dan il-mod wieħed ikun jista’ jikkonkludi jekk il-parteċipant jibqax konsistenti bejn it-taħdit u l-kitba tiegħu stess. Finalment it-teżi tagħlaq b’konklużjoni ġenerali dwar ir-riżultati, dwar xi skoprejt u x’tgħallimt. Jingħataw xi suġġerimenti dwar dak li jista’ jsir aktar ’il quddiem f’dan il-qasam tal-varjanti fonetiċi-ortografiċi biex jinkiseb aktar tagħrif dwar dan is-suġġett.