Ir-relazzjoni bejn il-midwife u l-klijenta-omm : ricerka socjologika

Abstract

Waħda mill-aktar żviluppi qawwija li seħħew fid-dinja tax-xogħol f'dawn l-aħħar snin hija l-enfażi li bdiet titpoġġa fuq il-kwalita’ tas-servizz li jiġi pprovdut lill-klijent. Fejn qabel kien jgħodd il-kwantita’ jew il-volum bl-irħas prezz possibbli, illum nisimgħu diskors dejjem aktar b'saħħtu favur il-kwalita’ tal-prodott, aktar u aktar fejn dan il-prodott huwa servizz. F'sistema ekonomika dinjija llum maħkuma minn maġġoranza ta' mpiegi fil-qasam tas-servizzi, ma jistax jonqos għalhekk li wieħed jisħaq dwar il-kura tal-klijent. Tissemma' l-famuża frażi customer care, din biex tfisser kemm huwa importanti li jingħata l-aħjar servizz possibbli lill-klijent ħalli dan, jew din, tibqa' tfittex l-istess prodott mill-istess impriża. Dan jiggarantixxi suq għall-prodotti ta' din l-impriża; waqt li dawk l-impriżi li ma jinvestux biżżejjed f'din ir-relazzjoni jistgħu faċilment jitilfu l- klienti tagħhom għaliex dawn ma joħorġux kuntenti bis-servizz.