Inno con Canto di Voce Puerile

Abstract

L-‘Inno con Canto di Voce Puerile’ hu t-titlu oriġinali tal-‘Innu lill-Madonna tal-Karmnu’ kompost mis-surmast Emmanuele Bartoli fl-24 ta’ Mejju 1877. Wara t-Tieni Gwerra Dinjija dal-Innu kien ġie arranġat għal kumpless aktar modern fuq il-mudell tal-banda beltija minn Mro. Francesco Bugeja. Maż-Żrieraq Karmlitani dal-Innu hu komunement magħruf bħala l-Innu kbir ‘Warda Sbejħa tal-Karmelu’, versi ta’ Dun Frans Camilleri li kien kostrett jiktbu għall-mużika li diġà kellha l-versi tagħha bit-Taljan ta’ Ġużè Muscat Azzopardi. Il-partitura oriġinali tal-Innu tinsab merfugħa b’għożża kbira fl-arkivju tas-Soċjetà. L-għan ta’ dal-artiklu hu biex juri l-valur storiko-mużikali tiegħu. B’hekk ikun aktar apprezzat mill-qarrejja u s-semmiegħa li ta’ kull sena jassistu bi ħġarhom għad-daqq tiegħu fil-festa waqt li l-vara artistika u devota tal-Madonna tal-Karmnu tal-1842, maħduma b’ħila kbira u tal-għaġeb mill-iskultur Salvu Psaila (1798-1871), tkun biswit il-planċier. Nieħu dil-okkażjoni biex nirringrazzja lil Mro. Mauro Farrugia, arkivista u assistant-surmast tas-Soċjetà, tat-tagħrif u materjal li għoġbu jgħaddili biex stajt ninseġ dal-artiklu.