Noti bijografiċi ta’ surmastrijiet fi ħdan il-Għaqda Mużikali Sant’Andrija

Abstract

Fost is-surmastrijiet li mexxew lill-Għaqda Mużikali Sant’Andrija ta’ Ħal Luqa fis-snin bikrin tagħha nsibu lil Mro Carmelo Abela [Farrugia], li dwaru nsibu xi ftit tagħrif imxerred ’l hawn u ’l hinn fl-ewwel paġni tal-ktieb ta’ Grech, li jittratta l-125 sena ħidma ta’ dis-soċjetà Luqija, u mhux f’Appendiċi Ċ, fejn hemm miġburin it-tagħrifiet bijografiċi tad-diretturi mużikali. Tagħrif ieħor nieqes f’dit-taqsima hu dwar Mro Carmelo Doneo (?-?), u Mro Antonio (Ninu) Pace (11.ix.1878–1950), li għamel seba’ snin surmast ta’ dil-banda bejn l-1900 u l-1907. Fil-lista msemmija, p. 380, dat-tliet surmastrijiet jiġu t-tieni, il-ħames, u d-disa’ diretturi mużikali rispettivament. Tajjeb ninnutaw ukoll, li fil-każ ta’ Carmelo Abela [Farrugia] (1888-9), dan kien wieħed minn sensiela ta’ ħames surmastrijiet li nbidlu kull sena: Mro Gaetan Grech (1889-1890), Mro Luigi Barbosa (1890-1), Mro Carmelo Doneo (1891-2) u Mro Gavino Camilleri (1892-3), jiġu eżatt warajh. L-iskop ta’ dal-artiklu għalhekk hu li jixħet dawl ġdid, jew jkompli jixħet aktar dawl, fuq is-surmastrijiet Abela [Farrugia], Doneo, u Pace. Fil-każ ta’ Barbosa, mhux faċli li wieħed jikseb xi forma ta’ tagħrif dwaru, imma nibqa’ sakemm forsi xi darba jirnexxili.