L-arti tal-kelma fid-diskorsi politiċi ta’ Duminku Mintoff (1962)

Abstract

Din it-teżi tanalizza seba’ diskorsi li għamel Duminku Mintoff waqt meetings pubbliċi fl-1962 u l-mod kif inqeda bil-lingwa ta’ kuljum biex iwassal messaġġ politiku lill-partitarji tiegħu. Hu lingwaġġ li mhux ta’ kuljum u juri l-ħila tiegħu fl-oratorija li tinqeda bi strateġiji u tekniki rettoriċi. L-ewwel kapitlu jħares lejn kotba u testi akkademiċi li jitkellmu dwar elementi fil-lingwaġġ figurattiv, speċjalment il-metafora kunċettwali u tekniki rettoriċi bħar-ripetizzjoni. Il-kapitli ta’ analiżi janalizzaw il-mod kif Mintoff jinqeda b’elementi tal-lingwa li diġà jeżistu biex jorganizzahom b’mod li joħloq il-ġdid minkejja li jippreżentah daqslikieku kien ta’ kuljum u ordinarju. Id-diskorsi tiegħu jinqdew b’lingwa sempliċi anke meta jitkellem fuq kwistjonijiet kumplessi. It-teżi turi kif dawn id-diskorsi politiċi għandhom valur letterarju. Fit-tieni kapitlu nistħarreġ l-użu tal metafora kunċettwali, is-similitudni, u l-parabbola, waqt li t-tielet kapitlu jara kif Mintoff juża l-anafora, l-epifora, il-chiasmus, l-asindeto, il-polisindeto, l-ipofora, u l-mistoqsija rettorika.