Imhabba u kunflitt fir-rumanz Malti modern

Abstract

Din it-teżi tipprovdi analiżi ta’ rumanzi moderni Maltin, mis-snin sebgħin ’il quddiem. L-għan huwa li dawn ir-rumanzi jiġu studjati mill-aspett ta’ teoriji psikoloġiċi b’rabta mat-temi ta’ mħabba u kunflitt. Il-varjetajiet ta’ mħabbiet hekk kif inhuma ppreżentati fit-teorija, huma ppreżentati wkoll fir-rumanzi, kif ukoll il-kunflitti differenti. Xi drabi b’xebh kbir bejn it-teorija u l-prattika, u xi kultant b’xi tibdil żgħir biex joħloq kuntrast. Kull taqsima għandha daħla biex tintroduċi dak li se jintqal fil-kapitlu b’referenza għax-xebh u kuntrast rikorrenti li hemm bejn ir-rumanzi fiż-żewġ temi magħżula. Għaldaqstant xogħol bħal dan kien jeħtieġ riċerka wiesgħa li toħroġ ’il barra mill-kritika letterarja lokali. Kotba dwar it-teoriji psikoloġiċi kienu ta’ importanza kbira f’dan l-istudju, wara l-ewwel pass tal-qari tar-rumanzi. Mill-qari u analiżi tar-rumanzi jidher kontinwament ix-xebh li l-awturi pprovaw jagħmlu ma’ dik tal-ħajja reali. L-għażla tar-rumanzi moderni wasslu lill-awturi biex ipoġġu lill-karattri tagħhom fil-ħajja tal-lum, u b’hekk ix-xebh mar-realtà huwa evidenti ħafna. Għalkemm is-sitwazzjonijiet huma komuni u jista’ jgħaddi minnhom kulħadd, l-għan tal-analiżi kienet li bl-għajnuna tat-teorija wieħed jifhem x’seta’ wassal għal ċertu tip ta’ mġieba, l-effetti li ħalliet fuq il-karattri, u b’konsegwenza ta’ xi falliment li tasal tagħmel persuna biex ittaffi t-tbatijiet u l-weġgħat tagħha.