Il-fjuretti tal-ganitill

Abstract

Il-Malti nissel l-isem ta' din is-sengħa mill-kelma Taljana 'cannutiglio ' . L-opri tal-ganitill (jew granotill, kif isejħulu xi wħud) kienu jikkonsistu f'bukketti ta' ward artifiċjali li bihom kienu jżejnu u jarmaw l-vari, l-artali tal-knejjes u l-gredenzi tas-swali. Il-fjuretti tal-ganitill kienu jkunu magħmula minn ħjut tad-deheb u tal-fidda, frak tal-ħġieġ u materjal ieħor ileqq . Dan ix-xogħol sab il-kenn tal-monasteri fejn is-sorijiet li jindaħlu għalih kienu jitħarrġu tajjeb biex finalment jitgħallmu s-sengħa li daż-żmien naqset mill-popolarita li kellha qabel. Kien hawn nies oħrajn li jaħdmu l-ganitill iżda l-livell tax-xogħol li kien joħrog minn idejn is-sorijiet kien fi klassi għalih. Din is-sengħa, is-sorijiet ma kienux jaħdmuha individwalment bħal ma ngħidu aħna l-ħjata u r-rakkmu. Kien xogħol kollettiv bejn tliet dipartimenti importanti li kienu: id-disinjaturi, il - kostrutturi u l-kompożituri.