Il-partiċipju passiv fil-Malti

Abstract

Din it-teżina, li tittratta l-partiċipju passiv fil-Malti abbażi tad-dizzjunarju ta’ Aquilina u tal-korp elettroniku MLRS (it-tielet verżjoni tal-2016), imsejjaħ minn issa ’l quddiem: Korpus, għandha żewġ għanijiet ewlenin. L-ewwel wieħed hu li ssir ġabra eżawrjenti tal-partiċipji passivi introflessivi, jiġifieri li għandhom il-prefiss m- u li jiġu identifikati l-forma verbali, l-għerq, u t-tifsir tagħhom. It-tieni skop hu li ssir analiżi tal-forom misjuba, fosthom mv12ū3, bis-sekwenzi vokaliċi, bħal ma12ū3, me12ū3, mi12ū3 u mo12ū3, u dawk tal-għeruq dgħajfa bħal fil-forom mv1Jū3/mv1Wū3. Se jiġu studjati wkoll il-varjanti fonetiċi-ortografiċi li jiddifferenzjaw ruħhom fil-vokali bħal 'maqlub' u 'meqlub', u fil-konsonanti bħal 'mdaħħak' u 'mdaħħaq'. Dan kollu jwassal għall-istħarriġ ta’ xi verbi li għandhom żewġ partiċipji, wieħed bil-prefiss m- u l-ieħor bil-konkatenazzjoni permezz tas-suffissi - āt, - ūt jew -īt bħal impinġi u pinġut, jew it-tnejn bil-konkatenazzjoni bħal 'ddefendut' u 'difiż'. L-analiżi tkopri wkoll il-forom ipotetiċi u l-verbi mingħajr partiċipju passiv, u l-espressjonijiet kopulari kien, ġie u safa(’) li joqogħdu qabel il-partiċipju passiv.