Charles Clews : kittieb u attur komiku popolari

Abstract

L-għan ta' din it-teżi huwa li nsiru nafu mill-qrib il-ħajja, il-ħidma u l-kontribut kontinwu għall-umoriżmu Malti, ta' Charles Clews, magħruf iktar bħala Charlie Clews. Huwa l-pijunier ta' l-umoriżmu Malti li, matul ħajtu kollha sa issa, ta s-sehem kollu tiegħu, kemm bil-kitba u bir-reċtar, biex iferraħ u jgħolli l-moral tal-poplu Malti. Matul il-karriera twila tiegħu Clews ħadem bis-sħiħ u għadu attiv sal-lum il-ġurnata. F'din it-teżi ppruvajt nagħti ħarsa lejn ħajtu, kitbietu u l-ħidma tiegħu fuq il-palk u fil-mezzi tax-xandir. L-ewwel kapitlu jlaqqa' lill-qarrejja mal-personaġġ, jagħtihom tagħrif bijografiku ewlieni u jixħet dawl fuq il-bidu tal-karriera u tax-xogħlijiet tiegħu. It-tieni kapitlu jiffoka fuq l-għadd kbir ta' kitbiet oriġinali tiegħu u jipprova jagħti stampa ċara ta' Charles Clews bħala l-kittieb umoristiku. Fit-tielet kapitlu tispikka l-arti performattiva ta' Charles Clews. Fih Clews se jidher mhux bħala kittieb iżda bħala attur komiku u "entertainer" fuq il-palk u fuq il-mezzi tax-xandir, l-aktar fi ħdan il-kumpaniji 'Stage Commandos' u 'Radju Muskettieri'. Ir-raba' kapitlu juri l-apprezzament tal-ħidma ta' Charles Clews u fejn irnexxielu jikkomunika permezz ta' l-umoriżmu tiegħu. Clews huwa figura interessanti għax, minkejja li għex fi żmien kiefer tal-gwerra u għadda wkoll minn xi żventuri personali, għelibhom bl-umoriżmu u għamel ħiltu biex jifraħ hu u jferraħ lil ta' madwaru. It-tama tiegħi hi li permezz ta' din it-teżi isem Charles Clews ma jmut qatt u li nqajjem interess biex jitkompla xi xogħol ġdid fuqu.