Id-duwalizmu filosofiku f'siltiet narrattivi mil-letteratura Maltija

Abstract

Id-duwalità huwa kunċett filosofiku rikorrenti ħafna, u fil-kultura Maltija huwa importanti ħafna anki għaliex hu parti mill-viżjoni Mediterranja tal-ħajja. Id-duwalità tixref f’bosta oqsma tal-ħsieb u tal-azzjoni f’Malta. Permezz tal-qari u tar-riċerka għal din it-teżina ksibt informazzjoni filosofika fuq il-kunċett innifsu. Dan kien meħtieġ ħafna biex stajt nistħarreġ elementi filosofiċi fil-Letteratura Maltija u dejjem b’riferiment għal ideat fondamentali fl-istorja tal-ħsieb. Letteratura u Filosofija huma meqjusin bħala sħab ta’ xulxin. F’din it-teżina beħsiebni naqsam ix-xogħol f’introduzzjoni mimlija teoriji filosofiċi li għenuni biex nibda nikteb u nibni pedament sod dwar il-kunċett innifsu. Wara l-introduzzjoni hemm tliet kapitli li jikkonsistu fil-kritika u ideat filosofiċi kollha marbuta mad-duwaliżmu. F’dawn il-kapitli ħadt diversi awturi Maltin li fix-xogħlijiet narrattivi tagħhom hemm ħjiel ta’ duwaliżmu f’xejra jew oħra. Se nispjega s-siltiet li nislet u noffri spjegazzjoni letterarja u filosofika għalihom. Barra minn dan se nitkellem dwar kif id-duwaliżmu preżenti f’dawn il-kitbiet għen biex it-tifsira toħroġ aħjar u b’mod ċar. Fl-isfond ta’ dan kollu hemm tradizzjoni filosofika twila li tibda minn żmien Platun u Aristotli; u tasal sa Descartes u l-eżistenzjalisti.