Iċ-ċelebrazzjoni tal-quddiesa għal tfal ta' bejn it-8 u l-10 snin

Abstract

"Hemm ir-riskju li l-Quddiesa ssir rutina għat-tfal meta dawn ma jkunu qed jifhmu xejn milli jkun qed isir, jew meta din iċ-ċelebrazzjoni ma tkunx tappella għalihom. Min-naħa l-oħra, meta l-Quddiesa tkun spjegata tajjeb - mimlija kif inhi b' simboliżmu rikk, qawwi u effettiv - it-tfal jieħdu sehem fiha bil-ferħ, b' sodisfazzjon ġenwin, u dan juruh waqt it-talb tagħhom b' vuċi ħajja, bil-kant, u bl-imġieba sewwa u dinjituza tagħhom." Alla jħobbna. Ahna ħolqien tiegħu. Huwa jaf x'insarrfu u kif aħna magħġunin. Għalhekk meta Huwa beda jirrivelalna lilu nnifsu, Alla kien fidil lejna l-bnedmin, u ttratta magħna b'mod li aħna stajna nifhmu dak li Hu ried iwasslilna. Kellimna bil-lingwaġġ tagħna. Inqeda bi ġrajjiet u fatti storici biex iġagħlna nirriflettu fuqhom, u b'hekk stajna naslu biex naraw x'irid minna. Fir- Rivelazzjoni Alla wera lilu nnifsu permezz ta' fatti, u permezz tal-kliem li jfissru dawn il-fatti jew ġrajja. Il-Bibbja tgħallimna kif Alla niżel għal-livell tagħna l-bnedmin biex iwasslilna messaġġi u tagħlim mill-aktar għoljin. Il-qofol tar- Rivelazzjoni hija l-inkarnazzjoni ta' l-Iben ta' Alla, Sidna Gesu' Kristu. Alla tant irrispetta lill-bniedem mill-mod kif ikkomunika miegħu, li hu sar bniedem bħalna f' kollox, 'barra mid-dnub'.