Il-fidi fil-kitba ta' Dun Ġorġ Preca

Abstract

Għal dan l-istudju fuq il-fidi, kif tidher fil-kitba ta' Dun Ġorġ, qiegħed nuża il-ktieb li jismu Id-Dettatura tal-Patri Majjistru Gregorju li ġie ippublikat fl-1943. Fid-daħla, li l- awtur stess isejħilha 'immaġinarja' jgħid li wieħed patri, waqt li kien marid fis-sodda minħabba ferita f' saqajh, ġie mitlub mill-ajk li kien idur bih, biex jgħinu fit-tentazzjonijiet li kellu fuq il-fidi u biex jgħix ħajja spiritwali aħjar. Il-ktieb li fih 113 il-paġna jikkonsisti prinċipalment f' 76 Dettatura u kull waħda minnhom fiha dawn il-partijiet: 1. Xi ħaga fuq il-fidi. Din ikun fiha espożizzjoni ta' xi verita' jew parti minnha jew xi argument li jgħin il-fidi. 2. Noti. Waħda jew aktar skond il-bżonn, biex jispjega dak li jkun qal. 3. Twissija għall-ġid. Xi ħaġa li għandu jagħmel, jew għandu jaħrab in-nisrani. 4. Ġakulatorja. Talba, ġeneralment qasira, li dejjem jibdiha "Għid 'l Alla ........ " u għaldaqstant kollha indirizzati lil Alla; tifħir, adorazzjoni ecc. Fl-aħħar hemm kap li jismu: Is-Sentimenti tal-Bniedem tal-fidi. Dan jikkonsisti f'sittax il-paragrafu li huma wkoll talb ta' tifħir 'l Alla fl-attributi individwali tiegħu, u dak Ii jħoss fih il-bniedem tal-fidi, skond dak l-attribut partikulari.