Gżejjer : letteratura mill-periferiji

Abstract

Daħla: McDonald's u sħabu jridu jiddettawlna kif ngħixu, kif naħsbu, min aħna u min jaqblilna nsiru. U l-McDonald's li jmexxuna jridu jgħidulna. dak li jidhrilhom, jew jaqblilhom li jfisser li tkun Malti jew Maltija. Imma aħna smajna biżżejjed. Il-proġett « gżejjer » mhuwiex biss ktieb, iżda jeżisti fuq kollox bil-għan li jfittex l-affarijiet li nħbew apposta matul is-snin - l-għeruq tagħna. Ngħiduha kif inhi, il-ħtiġijiet li l-globalizzazzjoni ħolqot għal Malta (li kważi nsiet li hi mxarrba bil-baħar minn kullimkien), qed jeqirdu lill-gżira tagħna stess. L-isfruttar ta' l-ambjent, in-numru esaġerat ta' karozzi, il-pixxina ftit metri 'l bogħod mill-baħar, il-korsa tal-golf, huma parti minn ċiklu li jistordik u jgħinek tbigħ lil din l-art ħelwa. U magħha l-għeruq. U l-ftit li jifdal jaqblilna nbigħuh bħala rikordju. Iżda 'l bogħod mis-sarkażmu, grupp ta' kittieba qed jaħdmu flimkien fuq proċess dinamiku li, fl-aħħar mill-aħħar, jistħarreġ dawn il-mistoqsijiet u oħrajn relatati magħhom, biex fuq dan il-pedament jinbena lingwaġġ kulturali ħieles. Il-proġett« gżejjer», għalhekk, għandu bżonn iqajjem kuntrasti bejn il-globalizzazzjoni u l-wirt lokali, bejn in-nord u s-sud bħala metafora ta' l-isfruttament wiċċ imb'wiċċ ma' l-isfruttati. F'dan l-ispirtu, artisti minn « gżejjer » oħra bħal Sardinja, il-Kalabrija, Sqallija, l-Ebridi u oħrajn, qed jasserixxu r-rilevanza ta' dik li hemm min jaqbillu jsejħilha « l-periferija ».