L-ambigwità tal-eroj : Leli f’Leli ta’ Ħaż-Żgħir u Filiċ f’Ulied in-Nanna Venut fl-Amerka

Abstract

Fil-kunċett tal-‘eroj’ letterarju hemm ambigwità semantika li tidher fil-figura tal-eroj matul iż-żminijiet, għax minn banda l-eroj huma nies eċċezzjonali li jogħlew ’il fuq mill-oħrajn, u mill-banda l-oħra huma ‘sempliċiment’ il-protagonisti ta’ xogħol letterarju, anki jekk m’għandhomx kwalitajiet li jagħżluhom mill-bqija tal-karattri. Stefano Jossa jidentifika din l-ambigwità fil-qalba tal-kelma Taljana ‘eroe’ (“Premessa”), iżda l-istess jista’ jingħad għal ‘hero’ bl-Ingliż.