It-tagħlim tal-Malti bħala lingwa barranija dwar it-tema tad-dar u l-bini ta’ madwarna

Abstract

F’din it-teżi se jiġi ppreżentat pakkett ta’ riżorsi li miegħu se jinkludi deskrizzjoni dettaljata ta’ kull riżorsa. Dan il-pakkett jikkonsisti minn għoxrin riżorsa, li kollha huma marbutin mat-tema ta’ djarna u l-bini ta’ madwarna: għaxar riżorsi tradizzjonali jiġifieri leħħiet, puzzles u karti tat-taħriġ, kif ukoll għaxar riżorsi diġitali eżempju kwiżż, powerpoints u logħob interattiv. Dawn ir-riżorsi huma mmirati għall-istudenti li qed jitgħallmu l-Malti bħala lingwa barranija, fl-iskola Medja u Sekondarja li jinsabu fil-livell elementari tal-Common European Framework of Reference for Languages (CEFR), jiġifieri livell A1 u A2. Għalhekk, dawn ir-riżorsi għandhom jolqtu l-erba’ ħiliet tal-lingwa, jiġifieri: il-qari, il-kitba, is-smigħ u t-taħdit. Permezz tat-tema prinċipali, l-istudenti se jkomplu jkabbru t-tagħlim tal-vokabularju u se jiltaqgħu u jitħarrġu f’aspetti grammatikali marbuta mal-prepożizzjonijiet. Apparti mill-ħolqien tar-riżorsi, ħadt sehem fil-proġett MaltiTek. F’dan il-proġett jien ikkoreġejt il-lessemi u l-forom derivattivi ta’ erba’ verbi: għalaq, żejjen, kines u għasar. Permezz ta’ dan il-proġett dawn il-verbi setgħu jkunu aġġornati fis-sit il-‘Ġabra’. L-għan ta’ dan kollu huwa li niffaċilita l-mod ta’ kif l-istudenti jitgħallmu l-Malti bħala lingwa barranija.