Il-mużika Pawlina tal-familja Nani fl-Arkivju tal-Katidral Metropolitan tal-Imdina

Abstract

Sa minn żminijiet imgħoddija l-istorja mużikali rikka ta’ Malta kienet ikkaratterizzata mill-funzjonijiet liturġiċi tal-Knisja, u għalhekk, ir-repertorju tal-mużika sagra kiber u ffjorixxa, b’mod konsistenti, tul is-sekli. Ħafna minn din il-mużika tinsab ikkonservata fl-Arkivju tal-Katidral Metropolitan tal-Imdina. Dan l-arkivju huwa wkoll xhieda tal-istorja rikka u jitfa’ dawl fuq aspetti, reliġjuzi, soċjali, storiċi, artistiċi, letterarji u mużikali, dwar Malta, speċjalment bejn is-sekli sbatax u għoxrin. L-arkivju jinqasam f’erba’ kategoriji li huma, l-arkivju tal-inkwiżizzjoni, l-arkivju tat-tribunal veskovili, l-arkivju tal-knisja konventwali tal-Ordni ta’ San Ġwann u l-arkivju kapitolari, li fih jinkludi wkoll l-arkivju mużikali. Ma tistax issemmi l-mużika u l-festa liturġika ta’ San Pawl tal-Belt Valletta mingħajr ma’ ssemmi d-dinastija Nani, familja intrinsikament marbuta mal-mużika Pawlina f’Malta. Il-Familja Nani hija ġenerazzjoni ta’ mużiċisti u kompożituri mis-seklu tmintax sas-seklu għoxrin fejn ħalliet kollezzjoni ta’ mużika lill-Katidral fl-1983.