Il-lehma wara l-marċ funebri

Abstract

Fl-artiklu tiegħi ‘Il-marċi funebri u mużika oħra b’rabta mal-Ġimgħa Mqaddsa fix-xogħlijiet tas-surmastrijiet Miruzzi, Attard u Pirotta’, li deher fl-aħħar żewġ fuljetti ta’ ‘Is-Salvazzjoni Tagħna’, kont għedt li Mro Antonio Miruzzi (1967-1944) ‒ li dis-sena jaħbat proprju għeluq il-75 sena minn mewtu, li ġrat fit-23 ta’ Ottubru ‒ kien jinfluwenza ħafna ruħu mill-ġrajjiet soċjali u drammatiċi ta’ żmienu (speċjalment matul l-Ewwel Gwerra Dinjija), u swewlu ta’ ispirazzjoni għal biex jikteb għadd ta’ marċi funebri. B’hekk hu seta’ jikkomemora x-xeni ta’ qsim il-qalb kull meta jinzerta jara l-funerali għaddejjin bil-vittmi tal-gwerra ta’ Gallipoli fi triqithom lejn iċ-ċimiterju ta’ Braxja, f’tarf il-Ħamrun. Ħafna drabi, dal-funerali kienu jkunu akkumpanjati mid-daqq kiebi tal-marċi funebri mill-baned Militari.