Ġużè Galea : rumanzier

Abstract

It-teżi – Ġużè Galea : rumanzier – tħaddan fiha l-ħajja fil-qosor ta’ l-awtur, ir-rumanz Malti u post Galea fil-letteratura Maltija, u l-qofol ta’ dan l-istudju hi kritika letterarja tar-rumanzi li Galea kiteb. F’din il-kritika barra l-ħames rumanzi li ppubblika sa kemm temmejt dan l-istudju, wiħed isib studja wkoll fuq is-sitt rumanz ta’ Galea ‘Fiex wasalna’ li għadu manuskritt. Kien impossibli għalija li tul dan iż-żmien nagħmel kritika fit-tul tar-rumanzi kollha ta’ Galea u għalhekk għażilt l-ewwel rumanz li l-kittieb stampa ‘Żmien l-Ispanjoli’ bħala studju dettaljat u fit-tul. Ir-rumanzi l-oħra studjajthom ukoll iżda f’dan l-istudju wieħed isib l-elementi ewlenin ta’ kull rumanz imbarra dawk l-elementi li studjajt fit-tul meta kont qed nagħmel il-kritika ta’ l-ewwel rumanz. F’dan l-istudju l-qarrej isib ukoll intervisti li jien għamilt lill-kittieb u minnhom wieħed jista’ jikseb ħafna tagħrif bijografiku fuq l-awtur u kummenti u ħwejjeġ oħra fuq ir-rumanzi tieghu. Tagħrif bijografiku ieħor il-qarrejt isibu fil-gazzetti li jien tajt, lista tagħhom, bid-data, u bis-suġġett f’parti oħra tat-teżi. Jien ġbart ukoll il-kitba ta’ kittieba oħra li kitbu fuq ir-rumanzi ta’ Galea. Iżda f’dan l-istudju jien tajt lista biss tagħhom u b’hekk għhint lill-qarrej li jekk jixtieq ifittex xi riċensjoni fuq xi ktieb ta’ Galea (u hawn daħħalt il-kotba kollha ta’ Galea) malajr jista’ jsibha.