L-ordni tal-kostitwenti fil-Malti fil-qafas lessiko-funzjonali

Abstract

Dan l-istudju jidħol fil-fond tal-kwistjoni ta' l-ordni relattiva tal-kostitwenti fil-Malti fi ħdan il-qafas tal-Grammatika Lessiko-Funzjonali (GLF). Permezz ta' dan il-mudell lingwistiku dan l-istudju jesplora xogħlijiet bħal Kalmar u Agius (1981), Borg (1988), Fabri u Borg (2005), Borg (2007) dwar is-sintasi tal-Malti u jibni fuqhom. Il-GLF toffri mezz kif l-analiżi ssir b'mod iżjed organizzat u dettaljat għax, fost l-oħrajn, tippermettilna nifirdu l-istruttura tal-kostitwenti minn dik funzjonali. Lingwa għandha potenzjal li toħroġ b'numru inifinit ta' sentenzi. Dan l-istudju qed jiffoka fuq tip wieħed, jiġifieri s-sentenzi monotranżittivi. Fis-sentenzi mistħarrġa ninqdew bl-istess kostitwenti, jiġifieri bil-verb 'kiel', u n-nom 'it-tifel' bħala s-suġġett, u n-nom 'it-tuffieħa' bħala l-oġġett dirett; filwaqt li magħhom jiżdied l-aġġunt f'pożizzjonijiet differenti. Xi drabi l-aġġunt ikun l-avverb sentenzjali 'lbieraħ' u xi drabi jkun l-avverb verbali 'malajr'. B'dal mod l-istudju jirrevedi x'sar fix-xogħlijiet preċedenti dwar l-ordni relattiva tal-kostitwenti fil-Malti, u jitfa' dawl fuq sentenzi b'iżjed kostitwenti.