Biblijografija magħżula ta' traduzzjonijiet (1752-1994)

Abstract

F'din id-dissertazzjoni rriċerkajt il-kotba li ġew tradotti f'ilsienna bejn l-1752 u l-1994 u li jinsabu fl-iskedarji tal-Bibjoteka Nazzjonali. Xogħlijiet minn bosta pajjiżi ewropej bħal Franza, Italja, u l-Inghilterra. Barra l-fatt li dawn it-traduzzjonijiet ġew kollha elenkati biex jaqdu funzjoni storika, għamilt ukoll lista ta' tradutturi u ta' l-awturi. Dan sabiex jingħata lok għal studju u analiżi, li jħarsu lejn l-influwenzi letterarji u kulturali fi żmien storiku partikolari f'Malta. Din ir-riċerka għall-kotba li ġew tradotti bil-Malti, ġiet magħmula minn fuq iż-żewġ skedarji ta' l-awturi tal-Bibjoteka Nazzjonali. Preċiżament dak ta' qabel l-1955 u dak ta' wara l-1955. Nenfasizza riċerka għall-kotba għaliex minkejja sibt numru ta' traduzzjonijiet fuq gazzetti li okkażjonalment rajt, kont inkun qiegħed inqarraq bil-metodu ta' riċerka li kieku żidthom, ladarba l-parametri tiegħi kienu l-kotba tal-Bibljoteka Nazzjonali. L-istess ħaġa għal kotba oħra li ma kinux skedati u sibthom waqt li kont qed inqalleb f'katalgi oħra barra tal-Bibjoteka Nazzjonali, eżempju Tislima lil Malta ta' Silvio Papalia Jerace, tradott minn Albert Cassola (Malta 194? : Veritas Press). Ta' min jgħid li t-traduzzjonijiet miġbura ġew elenkati f'ordni kronoloġiku sabiex tingħata l-perspettiva storika tal-proċess u l-ħidma tat-tradutturi. Dwar dan ninnota li l-perjodu li fittixt fih kien jibda mill-1752 sa l-1994. Mill-1752 għar-raġuni li din hija d-data ta' l-ewwel traduzzjoni bil-Malti magħrufa s'issa u sa l-1994 għaliex il-kotba li ħarġu f'dawn l-aħħar snin għadhom mhumiex imniżżla fl-iskedarju tal-Bibjoteka Nazzjonali.