Is-sens ta' storja fin-narrattiva tat-tieni nofs tas-seklu 20, u wara

Abstract

Is-sens ta’ Storja ma joħroġx biss billi wieħed jaqra kotba li jirrakkuntaw avvenimenti li ġraw fil-passat. In-narrattiva Maltija tat-tieni nofs tas-seklu għoxrin u wara turina l-iżvilupp tas-soċjetà Maltija matul żminijiet differenti. L-aspetti reali fir-rumanz Malti jagħtuna tagħrif interessanti u bżonjuż biex infittxu għeruqna u nkunu nafu l-ġenerazzjonijiet ta’ qabilna kif għexu. Dan kollu jwassal biex nikkuntrastaw żminijiet differenti fis-sens storiku li fih il-bniedem ikun qed jgħix.

Iż-żmien jagħtina ċ-ċans naraw dak li nbidel fl-ideoloġija Maltija u l-modi ġodda li l-poplu beda jgħix fl-aħħar snin b’differenzi minimi jew kbar meta mqabbla mas-snin ta’ qabel. Ix-xogħol u l-edukazzjoni jirriflettu l-istatus ta’ missirijietna fl-atmosfera storika li kienu qegħdin jgħixu fiż-żmien. L-aspetti reali flimkien ma’ diversi aspetti soċjali juruna l-valuri tal-Maltin li ssawru fuq tradizzjoni li bniet Storja għal kollox Maltija. Dak li jseħħ fil-pajjiż huwa marbut mal-poplu b’kontinwazzjoni ta’ żminijiet differenti biex dak li nbeda ma jintemm qatt.