L-Angliċiżmi fil-Malti

Abstract

Ilsien iwessa’ l-lessiku tiegħu billi joħloq kliem ġdid mir-riżorsi tiegħu stess (bħal meta jgħaqqad verbi (miera, ttama) ma’ affissi (-uż, -ar) biex isawwar aġġettivi (meruż) u nomi (ttamar), jew meta jġonġi nom ma’ ieħor f’kompost, lumi-larinġ, sodda-sufan) u billi jimporta kliem minn ilsna oħra; dak li jissejjaħ kliem missellef. F’dan l-artiklu nużaw itterminu selfa (pl. selfiet) minfloku, għax lingwa mhux kliem biss tissellef, imma ħsejjes, regoli fonoloġiċi, morfemi, mudelli sintattiċi, assoċjazzjonijiet semantiċi, u l-bqija. Fid-diskussjoni dwar is-self, ħafna drabi jiżżeffen fin-nofs l-argument tal-lingwistika tradizzjonali, li tgħid li s-self minn lingwa għal oħra jseħħ primarjament għall-bżonn jew għall-prestiġju. Meta l-kelliema ta’ lingwa jiksbu idea jew kunċett minn barra, jeħtieġu terminu għalihom. Hekk nagħmlu fil-każ ta’ annimali li m’ilniex li sirna nafu bihom, bħaċchimpanzee u l-isquirrel, nissellfuhom għall-bżonn. Iżda meta nimpurtaw kliem bħal uncle u auntie, inkunu qed nissellfu għal-lussu, għax għandna l-koppja indiġena ziju u zija, li jiffurmaw parti mill-vokabolarju bażiku tal-kelliema tal-Malti