San Ġorġ : ħamsin sena bażilika

Abstract

Lura għall-1958. Kienet il-ġurnata tal-Ħadd. Ottubru kien diġa daħal fil-ħames jum. L-arloġġ kien qed jimmarka l-erbgna ta' wara nofsinhar hekk kif l-arċipriet Cefai ntlemaħ riesaq b'pass meqjus fuq il-presbiterju tal-knisja li kienet maħnuqa bin-nies. Ma kienx spettaklu ta' kuljum, aktar u aktar f'dak iż-żmien tas-sena meta l-ħajja fil-parroċċa tkun għadha qed tistejqer mir-ritmu kajman tas-Sajf. Kienet ħaga ġdida fjamanta, mingħajr l-iċken dell fil-ġrajja l-imgħoddija; kien preżent mingħajr passat, iżda b'ġejjieni kbir. F'salt wieħed l-għagħa tan-nies intfiet f'ħemda li ttarrax il-widnejn. L-arċipriet, wieqaf dritt xemgħa wara l-mikrofonu, beda jtarraf kelma, tnejn, tlieta sakemm inkiser u b'lħnen kommoss - li ma kienx soltu tiegħu - berraħha: "San Ġorġ bazilika". Kien għoddu mank spiċċa jlissen l-aħħar sillaba li l-kotra ma nbidlitx f'miġemgħa ta' radd il-ħajr Iil Alia u, waqt li refgħet ħarsitha 'I fuq, instemgħet tidwi l-għajta immortali ta' "Viva Ġorġi tagħna". Bid-digriet Merito dilaudatur templum, li jġib id-data tas-6 ta' Settembru 1958 u li permezz tiegħu l-Q.T. il-Papa Piju XII għoġbu jgħolli l-knisja parrokkjali ta' San Ġorġ għad-dinjita ta' bażilika minuri, infetaħ staġun ġdid, anzi bdiet rebbiegħa ġdida għall-parroċċa l-antika tal-gżira, fejn il- "flores apparuerunt in terra,... vox turturis audita est in terra nostra", "fuq l-art ġa deher il-ward, ... fuq artna nstema' leħen il-gamiem" (Għan 2:12). Huwa tajjeb li niftakru kemm nisslet ferħ din il-ġrajja ta' gieħ. Huwa tajjeb li nagħrfu l-merti li kienu ta' fejda sabiex il-knisja tagħna tiżżejjen bl-unuri kollha ta' bażilika. lżda kemm ikun aktar tajjeb jekk nidħlu fil-qalba ta' dan l-isem li jgħodd l-eluf ta' snin!